XOVES 22/02/07, ás 20:00h
PLENO NO CONCELLO
Os colectivos cívicos, Asociación Cultural Alén Nós, Asociación Cultural “O Fervedoiro”, Organización Activista de Redondela OAR, a Central Unitaria de Traballadores CUT, a Liga Veciñal de Redondela, o Foro Social pola Defensa do Pobo, GAS Vigo e responsables da web redondelá indiredo.com, en relación co proceso da nova adxudicación do Servizo Municipal da Recollida do Lixo a unha empresa privada, queremos manifestar que:
Hoxe xoves 22 de febreiro de 2007, ás 20:00 hs., no setimo punto da orde do día, o pleno municipal de Redondela deberá aprobar ou non, a futura Concesión do Servizo de Recollida do Lixo a unha empresa privada. A corporación dos 4 últimos anos, decidirá o futuro do servizo dos próximos 20 anos. Os veciños, forzosamente pagadores, non serán tidos en conta nin escuitados, terán a obriga de pagar, e a resignación de “calar”.
Que despois de 10 anos sufrindo un servizo público, precario da recollida do lixo, e despois dunha legislatura sen que se reuna a Comisión de Seguimento dos Servizos Privatizados, non entendemos nin compartimos que novamente o noso Concello pretenda adxudicar o servicio sen informar ós veciños, nin coñecer as demandas ou suxestións dos usuarios que o sufren a diario.
Despois de 10 anos de diversos incumprimentos dun servizo por parte dunha empresa privada, despois de 10 anos de ausencia de control e desinformación do funcionamento deste servizo (e doutros) sen convocar nin informar detalladamente a veciños e usuarios, por parte do noso Concello, non compartimos que se pretenda continuar co mesmo modelo de xestión, primando os adxudicatarios con 20 anos de concesión, e adxudicando o servicio por un importe (máis de 960.000 euros) para nada xustificado e contrastado cos usuarios.
Pensamos que co remate do contrato da actual concesionaria Urbaser, o pasado 1 de agosto, o noso Concello está máis preocupado por adxudicar o servizo sen máis, que en satisfacer as necesidades reais do servizo, as necesidades de Redondela.
Os usuarios dos servicios públicos privatizados de Redondela sentímonos desamparados pola administración local xa que non se nos informa, non se nos convoca, non se nos permite expresar nos órganos públicos de control dos servizos as nosas demandas, suxestións e denuncias de incumplimento reiterados dos pregos e obrigas das concesionarias, polo que nos resistimos a quedarnos mudos unha vez máis ante unha reiterada situación de indefensión dos veciños e usuarios, ante a administración local e a empresa concesionaria. Os veciños somos pagadores forzosos dun servizo no que non se ten en consideración as nosas demandas nin opinión. Xa que pagamos, queremos escoller. Polo que asistiremos a este pleno a manifestar o noso rexeitamento a unha nova privatizacióne e o noxento “modus operandi” desta nova adxudicación por parte do governo local.
Concluimos que adxudicar os servicios a empresas privadas, é un signo da incapacidade e incompetencia dos nosos xestores e representantes públicos, e funcionarios, para xestionar directamente uns servizos públicos en beneficio de todos, non só dunha empresa e un governo municipal.
Por todo o anteriomente exposto SOLICITAMOS dos membros da corporación a súa responsabilidade cos veciños e usuarios deste servizo, a suspensión temporal do Concurso de concesión, mentres non se realice un estudio independente e profundo do servicio de recollida do lixo, se faga coñecemento e exposición pública do estudio, se debata cos usuarios e colectivos afectados e se escoite as demandas e suxestións da cidadanía.
